دم غامق لونه اقرب للسواد مخلوط بخلايا ميته. ملزقة. مزاجي خرا, جسمي منفوخ وحالتي تقرف. بطني وجعاني. وجوا الرحم, في زاوية ما, حتة حديدة مدببة وجعها اقرب لطعم الصدأ. ده احساسي بالكتابة. لما عملت المدونة, كنت حاسة اني كل يوم هقول جديد. عشرات الأفكار المحبوسة هاتندفع على الورق الإفتراضي. شهور بفكر, اسابيع بحضرلها, وايام, باختار الوانها وشكلها. حامل في بنت, شعرها اسود وناعم. اصغر من كف ايدي, لكن جميلة.
هنا, عالصفحة دي, شفت بعنيا جنين مشوه, اتولد في لحظة ابدا مش مناسبة. حركة عنيفة ووهم اهبل بلإمتلاء كانوا السبب.
محتاجة دكتور نسا!!