ساعات بفكر ان كل الحاجات تشبه بعضها. عارفة ان ده مش صحيح, والدليل, اني لسا بدور.
الليلة دي غريبة, كان نفسي أرجع الاقيك هنا. محتاجة اتكلم. بس لما فكرت شوية, اكتشفت اني اخترعت المدونة دي, عشان اقول كل الحاجات اللي ماكانش ينفع ابدا اني أقولها. وان ده كله ملوش علاقة بيك. انت جزء من الحالة, دافع لطيف اتسند عليه عشان اطلع كل الحاجات اللي محيراني. تلكيكة تقدر تقول. اسمحلي اقوللك, برغم كل الإحتياجات اللي واضحة عندي واللي بتقلقك وبترعبني مني, كل الحاجات اللي بتخليك تاخد كل المسافة الي حاساها دلوقت حالاً, برغم انك عاجبني وواعية بجد انك فاهمني, إلا ان احتياجي الحقيقي هو اني اكون انا, بشكل مستقل عنك وعن أي حد أو حاجة تانية. هو انت مين؟!
محتاجة اركز جوا نفسي. زيك كدا. ولا اقوللك, مش زي حد. عاوزة اشوفني, واحبني. وعشان كدا, يمكن, بفكر اني مش محتاجالك. ولا عاوزة حد زيك يخطفني مني.
الدنيا غريبة. لطيفة, لأ مش لطيفة, الدنيا حلوة ومجنونة وتستاهل ناخدها بجد. نحسها وننبسط بيها ومانزعلش لما تخبطنا بكام مفاجأة. برغم سخافة مفاجآتها, إلا اني بحب كل تفصيلة هبلة بتاخدني وبتحسسني اني لسا عايشة. سكرانة موت, السكر حلو, بس الحشيش احلى, اروق واهدا وبيهديك متعة الهروب. جوا الحشيش انا بستخبى. انت مش محتاج حشيش.
سكرانة اكتر من ورقة طايرة في ليلة معفرة. مش عارفة ليه مشيت من عندها. وليه كمان جيت هنا. مش مشكلة, مش عاوزة اكتر من اني اكون انا. كتير عليا؟
بالمناسبة, النهردة -من باب المفاجأة- اكتشفت اني بحب أسمع.
تعبت من الإفتراض, تعبت من الواقع الحقير, تعبت من محاولات الهروب, وتعبت أكتر, من اني احاول ألاقي نفسي اللي مش واضحلي اصلا هي مين, أو عاوزة ايه. مليون سؤال ومليون محاولة اني الاقي ولو إجابة واحدة. حيرتي بتاكلني. عمري بيضيع في الأسئلة . عمري هايضيع في الأسئلة. والوقت لو تعرف مش بيساعدني. بكبر وبصغر في الدقيقة الواحدة مليون سنة, بهرب للعجب والدهشة. واحيانا, لمتعة الغباء.
الذكاوة مش دايما شطارة, والحساسية تهمة لازم تتخلص منها في اللحظة المناسبة. انا مش غبية, بس واعية اني مش محتاجة الذكاء. مش عاوزة أفهم. أو يمكن لو فهمت أرتاح شوية؟ يلعن دين الأسئلة. يلعن دين الإجابات الجاهزة والمشاعر اللي بتسمي الحاجات بغير مسمياتها. هي ايه اصلا الحاجات؟ وايه هي مسمياتها؟
يلعن ابو المسميات, والمصطلحات, وكل الحاجات اللي بتقصر من الكام السنة اللي هاتعيشهم ولو دقيقة. يلعن أي حاجة تلخبطني أكتر. بس تعرف؟ بكتشف, اللخبطة مش حاجة وحشةّ.